私家居
金色一向予人浮誇的感覺，喜歡金色又想不落俗套，配搭是最重要的一環。就如這間位於九龍塘喇沙利道的獨立屋，全屋以金為主色，但在設計師的精心布置襯托下，感覺柔和，豪華又不俗氣。
追求華麗
屋主吳先生與太太從事鐘錶及地產生意，他們想有華麗感、喜歡金色，但又不想將整間屋弄得金碧輝煌，曾於日本修讀過四年設計課程的設計師William說：「我會幫佢哋整少少details位，好似櫃的用色、窗簾、燈光等，各種配合，營造豪華感覺。同埋佢哋做生意，唔多唔少都會有啲風水嘢，金色都係旺屋主嘅。」不過有時為遷就風水，很多設計師都在設計上花很多時間去布置裝飾，但William卻沒有這個問題，「因為佢哋買呢間屋嘅時候已經睇埋座向，加埋地段同價錢，佢哋已經覺得好適合，所以設計上佢哋冇乜點樣規範我。」
凸顯貴氣
要凸顯富麗堂皇，但又不能俗氣，建材方面當然要小心選擇，雲石絕對是不二之選，單是正門地下的兩塊雲石，便已值八十多萬。「搵咗好耐，因為最主要係呢兩塊雲石嘅花紋、所有details位係完全對稱，其實係好難搵到，屋主話一定要擺喺門口位置，因為夠靚同夠豪。」除此之外，客廳兩條雲石造的羅馬柱亦是特別訂造，「因為行入客廳時會有氣勢啲。」除了雲石，當然不少得屋主喜愛的金色，例如金色的升降機、主人房的金色櫃、金色梳妝枱等，不過其實金色傢俬並不多，更多是利用黃燈去營造出效果，「黃色燈光除咗係襯番間屋外，令人感覺更relax、更warm，啱曬佢哋壓力咁大嘅生意人。」
木亦是屋主喜歡的建材之一，因此屋內的床、櫃、書枱等，都是木製，色調則以深木色為主。「屋主唔鍾意米白色，同埋再加上淺色的雲石，好容易令到間屋白潺潺，深色傢俬襯配金色，效果更好。」另外，窗簾、牆紙的花紋圖案亦有助家居提升貴氣，「主要以雕花圖案為主，因為夠grand，呢啲都係放喺客廳同埋主人房，至於書房同埋仔女房間則以條子為主。」
拆牆穿透
獨立屋連天台地庫共有五層，面積七千五百呎，屋主一家五口居住，但雜物不多，「屋主唔鍾意擺咁多嘢出嚟。」所以屋內的活動空間十足，為了增強空間感，設計師亦將飯廳牆、正門與樓梯之間的牆拆去，「雖然間屋大，但你一入屋時已經見到兩堵牆擋住視線，會好有壓迫感，拆牆除咗令間屋變得開揚，一眼可以望入客廳，再加埋客廳嘅一排落地大玻璃，增強穿透感。」 ####
客廳四正寬敞，梳化購自歐洲，蘭花是屋主從他在花墟的花店拿來裝飾。
獨立屋位於九龍塘豪宅區，屋主○三年入夥，裝修費約五百多萬。
門口這兩塊雲石合共八十萬。
之前試過選用雲石餐枱，但感覺累贅，最後還是決定用清澈簡單的玻璃餐枱。
獨立屋內設有升降機，金色的門及內籠夠氣派。
書房用條子圖案牆紙，「用花圖案會好辛苦，工作間用直間或者平衡啲嘅線條較好。」
書房用條子圖案牆紙，「用花圖案會好辛苦，工作間用直間或者平衡啲嘅線條較好。」
地庫亦設有廚房，屋主安裝了送菜用的「升降機」，方便傳菜上樓。
主人套房破格用水晶吊燈，感覺豪華，因為房間一邊是落地玻璃，光線十足，故沒有裝其他燈飾。
主人浴室以雲石為主，地下設有發熱裝置，冬天雙腳都可以暖笠笠。
地庫偏廳主要用作招呼朋友。
女兒房的床雖購自國內，但品質及價錢，均可媲美歐洲貨。
君王投資公司 6147 4588
1136期
