媽咪姐手帳
吳卓羲、張馨予嘅戀情向來備受注目。無他嘅，男嘅當紮、女嘅惹火。就上周六（22日）之嘛，張馨予着住一套白色透視裝現身東京國際電影節，條裙上露下露，鬼死咁sexy。
女友喺東京大出風頭，一支公嘅吳卓羲於是搵埋班麻甩老死打邊爐陪滾。日前，記者喺九龍城街市見到吳卓羲，佢一條友同海鮮檔阿姐打牙骹，之後買咗遊水海蝦，似為當晚開餐做準備。之後佢發現記者，不但主動打招呼，仲備定案：「我買嘢打邊爐啫！」咁有冇預埋張馨予先？點知吳卓羲難得坦白：「佢唔喺度呀，唔信你哋可以伏下。」得、得、得，你講媽咪姐一定信。事實上，當晚吳卓羲同男友人上咗朋友屋企開餐，的確冇講大話。張馨予可以放心！
####
吳卓羲好熟路去咗相熟嘅海鮮檔買蝦，仲同老闆娘嗲咗兩句。
當日吳卓羲見到記者即打定底，指自己只係嚟買火鍋料。 買完仲急急腳返上車，冇再去過其他地方。
到傍晚時分，吳卓羲同一男性友人，拎住之前所買嘅海鮮上朋友屋企食飯。現場所見，冇其他女仔在場。吳卓羲應該冇曳曳。
算你冇講大話啦！（設計對白）
張馨予早前出席東京國際電影節，一襲透視裝驚艷全場。
848期
