媽咪姐手帳
當年小虎隊嘅胡渭康「忍着淚說一聲goodbye」，但近期佢全面復出，仲計劃出年一月推出重生後第一張唱片， 所以搏老命咁執靚副偈！佢本來都青靚白淨， 比小虎隊另外兩個兄弟保養得好，好似食咗成擔防腐劑咁。最近康仔仲有健身中心贊助， 美容公司又搵佢做代言人，豬籠入水之餘，年中慳埋唔少扮靚錢，真係羨慕死人！
日前媽咪姐跟住康仔去健身兼做facial， 諗住偷吓師， 點知貪靚嘅佢話：「我食得大閘蟹太多，搞到皮膚敏感呀！已經打咗針，希望快啲好番啦。不過保養嘅嘢唔係一朝一夕， 好似我咁唔飲凍嘢、 唔飲酒都好多年，又自己煲湯水， 因為父母年紀大，要自己照顧自己㗎。」唔講唔知，康仔勤力做收眼袋療程之餘， 做做吓仲學到幾吓散手，會返屋企幫自己做㖭！
小虎隊嘅林利（左）同胡渭康（中）都先後成為美容集團DR嘅代言人，不過康仔個樣真係young啲囉！係咪因為佢識做面部推拿呢？ ####
神呀！我要靚一世！（設計對白）
有California提供私人教練陪操，胡渭康自然搏盡！43歲仲有咁嘅體力，唔簡單嘞。
咁認真去貪靚「防腐」，媽咪姐都要寫個服字呀！
856期
